買入長揸不合時宜

美國政府出招救金融業愈救愈跌，最新一招係上周宣佈把持有的花旗銀行優先股轉作普通股，此舉雖可減少花旗支付優先股的利息，但並無向花旗注入新資金，市場亦擔心這並非政府最後一次救花旗的行動。評級機構標普和穆迪亦在政府轉股後調低花旗評級，令花旗股份再急插至1.5美元。加上美國去年第4季經濟收縮情況比估計嚴重，杜指上周五跌至7062點收市，跌119點，跌幅1.8%。

滙控今天公佈業績，英國報章消息滿天飛，話滙控將削減派息，並可能宣佈供股集資120億英鎊(即1320億港元)。滙控曾經被香港人譽為股王，如今股價56.95元，在美國預託證券更見53.98元，已跌回 96年的價錢，即係過去12年買入滙控者，全部都要輸錢。

買得滙控絕大部份係投資者，而唔係投機者(買滙控輪者例外)，但一樣中重招，若在 07年10月時以150元高位買貨者，如今得番三分之一。滙控的下跌，絕對損害唔想炒炒吓的投資者的核心價值，他們信奉buy and hold(買入並長揸)的原則，認為咁樣比進進出出炒股好，愈跌愈買，愈買愈多，如今真係喊都無謂。

78億變幾千萬
如果你認為做咗滙控股東好慘，我可以安慰吓你，你一啲都唔算慘，呢個世界有好多人慘過你，呢個講法稍嫌阿Q，但也是事實，上面講的花旗是一個例子，AIG(美國國際集團)也是另一個例子，如果你係AIG的股東，你就慘過揸滙控100倍。AIG這隻美國保險股王，在2000年12月的高位是98.56美元，過去1年高位也有52.25美元，如今只有42美仙，如果一年前你話AIG會跌到42美仙，美國人一定當你發神經，有誰料到一年後會變成這樣，如果從8年前的高位揸到?家，只得番200分之1！

你可能會話，無人會見AIG跌咁多都唔走啩，我可以話俾大家聽，現實上大有人在，而且仲係最熟悉AIG的內幕人士(insider)，聽聞有個AIG亞洲區高層，擁有的股票加購股權，在高峰時值10億美元(78億港元)，如今跌到只值3幾千萬港元！

身家縮水之多，只能以「恐怖」兩個字來形容，你可能覺得3幾千萬已經好多，但試想你身家由78億跌到3幾千萬，都真係幾惡頂。這個故事第一個教訓，就係唔好聽咁多內幕人士的消息，因為內幕人士對自己家公司有偏愛，可能睇唔到公司的問題，君不見香港的交易所高層，正正是在股市唔係跌咗好多時，行使了購股權認股，但又無沽貨，結果隻股跌到四腳朝天，如果再跌多啲，隨時佢行使購付的稅款高過股份的市價。

講番AIG，你可能唔係好熟悉AIG的死因，我不妨講多兩句，AIG現價市值69億美元，只是高峰期的零頭，這家環球保險業巨企最直接的死因，是沽出大量的信貸違約調期(CDS)，信貸違約調期即係迷你債券背後的「資產」，性質是一種保險，債券投資者買了公司的債券，怕公司倒閉時一無所有，就走去買這些信貸違約調期，付出一年幾厘的保險金，以換取一個權利，在其持有債券的公司信用出問題時，就把這些債券「調」給信貸違約調期的交易對手，所以這些CDS其實等如企業的違約保險。

沽CDS殺AIG
一手把AIG搞大的AIG前行政總裁甘伯(Maurice Greenberg)，就係令AIG大量承擔信貸違約調期合約的始作俑者，佢發現沽出信貸違約調期合約非常好賺，所以大做特做，這也是AIG近年盈利急升執行業牛耳的一大原因。理由諗落好簡單，AIG賣人壽保險收保險金，每年都有大量投保人過世要賠償，但佢賣信貸違約調期這種企業保險，在金融海嘯到來之前，風平浪靜，鮮有大企業倒閉(之前幾年都只係一間安龍公司執咗)，所以沽出信貸違約調期合約，都係白收保險金，賣得多賺得多，AIG自然係盡量做，賺到笑。信貸違約調期的市場全無監管，交易規則又鬆，到去年底已發展成一個54萬億美元(唔係寫錯，真係萬億)的超巨型市場，亦潛藏巨大風險。

據甘伯的一個老友話，AIG是合該有事，甘伯一手促成AIG大量投身信貸違約調期的市場，但他自己深明箇中風險，如果由他一直執掌公司，在07年次按問題開始浮現之時，他應該識得走避，或許可以帶領AIG避過這場巨浪，不過甘伯在他事業高峰時，被一個州檢察官看中作狙擊目標，指甘伯以違規手法進行交易，結果甘伯在訴訟聲中黯然下台，公司就由經驗較淺者上台掌控。後來次按危機深化，企業爆煲機會大增，去年9月雷曼倒閉，更令信貸違約調期的合約價格大升，做咗咁多信貸違約調期合約的AIG中重錘，股價急挫，皆因大量公司岌岌可危，全部有違約風險時，沽出這些CDS隨時要賠到傻，搞到AIG資不抵債，成為一家負資產公司。

這個故事的第二個教訓是金融機構的股價可以跌到咁殘，皆因它們的生意有重大槓桿，遇上逆境時，隨時變成深度負資產。

金融行業槓桿遊戲
好多朋友唔明大銀行、大保險公司為何如此化學，股價可以跌到無譜，關鍵就係它們生意的槓桿。以保險公司為例，佢不斷收來客戶保險金，就利用保金進行投資，甚至加大借貸進行槓桿投資，爭取最大回報，保險金等如一個源源不絕的資金來源，要支付賠償的時間會滯後好多，所以在投資暢旺、搵錢容易的日子，水源充足的保險公司好易賺到笑。但在經濟逆轉時，保險公司本已難捱，若好像AIG那樣做了大量信貸違約調期合約，就等如壽險公司遇上地球大瘟疫，死人無數，賠到手軟，都唔係咁易捱。

銀行情況亦唔係好得好多，銀行亦係槓桿生意，佢一手收存款或在銀行同業市場借錢回來，另一手借錢出街俾客戶，所以銀行有1元淨資產，可以做10元生意，道理係咁，銀行有1000億美元資產，同時有900億美元負債，即係淨資產只有100億美元，即係有100億美元淨資產時去做 1000億美元生意，槓桿相當大。

有時銀行嫌借錢俾人賺1、2厘息差太少，就攞啲錢去投資，賺取更大回報，例如去買吓一啲叫CDO的東西，這些產品都有AAA評級，表面睇好似好穩陣，點鬼知這些產品和次按有關，一出事就大跌價，一跌跌3、4成。又例如銀行做樓按，借咗9成樓價俾業主，樓市跌落來，資產若跌3、4成，若要把資產貼現，家銀行豈不是馬上變負資產？

現金為王慎擇投資
上面講完金融業的高槓桿營運，這也是它們在好景時賺咁多錢的原因，但遇上這個百年一遇亦唔知幾時完的金融海嘯，它們的風險大增，而這種風險是真正的風險，不光是人家唱衰所致。

所以第三個教訓是簡單的買入長揸策略，已經不合時宜，現今全球化的社會，一切事情以10倍的速度發生，97年香港回歸港股升上17,000點，98年亞洲金融風暴跌番落5800點，2000年科網狂潮再上18,000點，翌年科網爆破又落到12,000點，到2007年又炒番到31,900點，如今跌到 13,000點，12年經歷3個起跌周期，你長揸股票升到高一高時唔走，結果跌番轉頭就一身蟻，如果揸着一隻AIG，更加可以變到差不多一無所有，你話揸咗啲四線神仙股跌咁多都心甘命抵，揸隻環球保險股王都變咁，就要明白現代社會企業用咁多金融槓桿搵食，無一隻股可以話十足穩陣。

買入股票，見升到癲時不妨沽吓，見到好股下跌，也不要不問環球股市下跌的情由，就盲目去愈跌愈買，在這場百年不遇的金融海嘯中，相信還有不少巨型公司要被淘汰出局，記住現金為王，慎擇投資，金融業乃高危行業，三思之後先至好落注。