记熟九大投资守则

我地出生后开始学习生命嘅守则（The Rules Of Life）；好多时嚟自我地嘅父母（有其子必有其父母），有时亦从其他人身上学习（三人行必有我师），有D系透过尝试及错误先学晓（例如我老曹1974年嘅经验同教训）。只要牢牢记住唔再重犯，我地便可生活愉快。

其中三人（股圣、Dennis Gartman及Puggy Pearson）都系投资界泰斗，他们订下九大守则。

前三条由股圣所订。

一、唔好输钱。一旦面对亏损便设法减少损失（我老曹将佢改良为止蚀唔止赚）。

二、股票市场设计系将金钱由经常性买卖者手中转到有耐性投资者户口中。平时远离证券行，唔好经常炒出炒入。

三、投资者需要的是气质（Temperament）而唔系智慧。例如独立思考、对自己有信心而唔系过分自信及控制个人情绪（我老曹改为有智慧不如追逐趋势）。

另外三条由Gartman所订。一、屋内永远唔会只有一只曱甴。正系福无双至，祸不单行。去年8月次按危机后，至今金融机构接二连三出现问题，证明永远屋内唔会只有一只曱甴。

二、喺牛市中可长线持有，熊市中只宜抛空（我老曹改为牛市中不妨做好友，一旦熊市来临便持盈保泰，因我老曹冇胆抛空）。

三、只有基础分析与技术分析一致先入市，投资集中优质股，入市时机用技术分析。

最后三条由Puggy Pearson所订:
一、20／80定律。无论喺赌场或期指市场，赢家只占20％，输家占80％。要成为20％少数，必须明白Top Down或Bottom Up策略（何谓Top Down？例如去年10月股市见顶后便保持睇淡，直到出现一浪高于一浪为止；何谓Bottom Up？即股市见底后便保持睇好，直到出现一浪低于一浪为止）。利用Pearson嘅方法，各位唔使经常问我老曹熊市几时完？喺恒指一再出现新低环境下只宜 Top Down。

二、学会管钱。好似赌钱咁，冇理由铺铺买，只有形势最有利时先赌，同时限注（例如熊市中，只动用30％资金，牛市中才动用70％资金）Keep It Simple；唔好赌你输唔起嘅钱，赌钱时要轻松而唔系搏杀；明白风险与回报关系。一如沙蟹，当形势有利时去尽D，形势不利时要识投降（唔好忘记止蚀沽盘）。

三、了解自己，严守纪律。大部分人赌钱往往输死而唔会赢死。理由系赢钱时缩，输钱时赌气。成功赌徒及成功投资者便相反，就系赢钱时去尽D，一旦输钱便缩。

上述三位都系当今投资泰斗，值得各位学习。只要善用九大方法，保证你六十岁退休时富有。