5月10日，周日。上周股市表現如雨後春筍，大量利好言論又再湧現，包括：一、經濟唔再壞落去；二、刺激經濟方案開始生效；三、股市快升穿年線（250天移動平均線）。人們已忘記3月9日嘅悲觀情緒。
2000年科網股泡沫爆破後，需要三年時間才復元；呢次CDO問題咁快便搞掂?!2008年10月嗰次反彈維持四十九個交易天，呢次反彈如果亦係四十九個交易天，高潮便喺5月20日。歷史上最長嘅反彈市喺1930年美股，曾維持六十五個交易天。
劣股升幅更勝良股
3月份美國消費者信貸減少111億美元，因失業率上升及銀行收緊信貸；由2007年高峰至今，美國消費者共失去2.55萬億美元信貸，較估計中大三倍。响咁嘅情況下，經濟可以復甦咩?!
《黑天鵝》作者Nassim Nicholas Taleb認為，2007年10月開始嘅環球經濟危機較1930年代更嚴重，因為家吓全球經濟更緊密地連在一起。紐約大學教授魯賓尼認為，政府估計第三季及第四季復甦未免太樂觀矣。經濟收縮速度在最近兩季的確放緩，但相信今年及明年GDP仍然係負增長。Taleb教授認為，依家最大威脅係通縮，政府不斷注資，可暫緩通縮壓力，但已令金價、銅價及油價响今年內回升。中國政府刺激方案可避免經濟陷入衰退，但中國經濟過分依賴美國同歐洲，最終仍然難以幸免。
3月9日開始嘅反彈，至今為止基礎良好嘅股份平均升幅32％，基礎極差嘅股份平均升幅68％！上述情況已清楚告訴大家，呢次係熊市二期嘅大反彈，而唔係牛市一期。上升理由係炒家入市，唔係投資者入市。上述數字應可回答大家邊個喺5月份入貨?!
VIX指數由今年1月嘅57點回落到5月初嘅34點，代表散戶由恐慌轉為樂觀。如VIX回升到40點，代表反彈市玩完。各位仲記得去年10月貝南奇估計美國衰退會响聖誕節後結束嗎？結果係美股今年1月6日起又再回落。呢次佢保守D估計衰退喺今年第三季結束，結果又會點？世上冇人擁有預測能力。各位請記住，Easy Money時代已結束，今天已變成Easy come, easy go。
佛學精神係接受無常，因為無常就係現實，現實經常變幻，非人的主觀願望可改變，亦不應企圖改變，更加不應企圖知道未來係如何改變，一切順應而行——人類唯一可做係放開自己思想接受現實，接受未來係不可預測（同「論勢」精神相似）。
點解地產出現boom & bust？奧地利經濟學派認為係政府將利率降至正常水平之下，上述喺Irving Fisher响1933年出版嘅Debt-Deflation Theory of Great Depressions已有說明。1920年代因利率低於通脹，最終引發1930年代資產負債表通縮；1980年代日本及90年代日式經濟又再印證上述理論；1990至1997年嘅香港地產及1997年至2003年香港又再證明。Friedrich Hayek教授爭拗上述情況正喺美國重演，即2003至2007年利率低於正常水平，引發2008年資產負債表通縮。2008年開始嘅金融危機係由資產價格泡沫爆破引發，由Great Moderation變成Great Unraveling，最終係Great Recession（因自律方面失控到無法解決困擾，最終引發衰退）。史丹福大學John Taylor教授亦認為，呢次泡沫爆破嘅遠因係由2001年聯儲局降低利率開始，相信2008年開始嘅資產負債表通縮將維持一段幾長日子。消費者對產品唔再感到飢渴，因為佢地已經冇蚊年消費，令今年第一季世界貿易量下降31％，成為世界經濟嘅致命傷。喺恒生指數接近或略破250天移動平均線嘅今天，大家請保持冷靜。
利用保歷加通道制訂策略
大摩亞洲區首席分析員羅奇認為，响中國政府刺激下，A股由去年10月開始急升，相信今年5月亦應見頂回落，因為2007年唔係1997年，更加唔係2000年。中國政府唔可能將第三產業由佔中國GDP 36％，一下子提升到50％。我老曹相信，A股走勢係W形而非V形，即去年10月到今年5月完成上升後又再回落，然後又再上升。各位可利用大部分人樂觀出貨，以及利用大部分人悲觀入貨，將股票市場變成閣下嘅提款機（ATM）。請利用保歷加通道（Boillinger Bands）協助自己制定買賣策略；保歷加通道喺上落市最有用。如能加入W％R（Williams percentage range）及陰陽燭便更好。相信企業純利周期今年見底，而股市走在經濟之前，因此唔排除去年10月及今年3月指數見底，但見底唔代表之後一定係繁榮。
本港銀行3月份貸款減少1.7％（較一年前減少3.6％），而今年首季係2000年3月以來最大嘅單季跌幅（減少3.6％）；其中又以貿易及財務跌幅最大，達15％；地產及建築跌幅最細，只有1％。3月份零售業少7.7％（減少9.3％）；存款上升1.6％（較一年前減少0.6％），未見有經濟復甦訊號。
中移動購入台灣第三大流動電話公司遠傳電信12％股權，令台灣股市今年出現過去十八年內最大升幅。台股指數已由去年11月21日3955點升上最近嘅6400點，升幅62％，唔少人估計年底可見7500點甚至9000點…。三通力量真係咁大，令跌咗十八年嘅台股重返牛市?!上周由溫家寶主持嘅國務院常務會議已原則上通過《關於支持福建省加快建設海峽兩岸經濟區之若干意見》。此區與台灣僅一水之隔，北承長三角洲，南繼珠三角洲；加上福建省和台灣人血緣相親，一旦大力發展，必可吸引台灣資金大量流入，成為繼珠三角、長三角後另一沿海經濟帶，促進兩岸互利共贏，提高經濟發展水平。所謂海西經濟區，包括浙江南部、廣東北部及江西部分，包括建福省九市、浙江溫州、麗水、衢州；江西上饒、鷹潭、撫州、贛州，以及廣東梅州、潮州及汕頭。
台股熊市結束言之尚早
上述《意見》通過，將令中國海峽兩岸經濟帶形成，實力將不斷增強，與台灣經濟優勢互補，為經濟繁榮提供寬廣發展空間。喺香港上市嘅海西區有關股份上周已起動，估計閩台之間嘅物流、石化、現代農業、LCD、LED等科技產業轉移及台資企業借殼上市，將帶來新景象。不過，因此而認為台灣十八年熊市結束，似乎太早咗D。4月份台灣出口減少34％，係連續第八個月回落，主因係美國、日本及歐洲經濟不景，令台灣高科技產品出口呆滯，只有向中國大陸出口才上升5％。未來台灣產品能否透過出口大陸而復甦?!依家內地LCD平面電視機顯示屏需求十分大（台灣响呢方面已係全球第三大出口地區）。中國開放海西經濟區，可令台灣高科技產業移向內地，但到時能否帶動台灣服務業上升則係疑問。
2000年及2007年開始嘅兩次衰退，都係因泡沫爆破。2000年嗰次透過大量增加貨幣供應而解決了，呢次又能否成功?!估計2009年美國財赤相等於GDP 12％，加上金價已重返900美元之上，前景有D令人擔心（英國財赤已達GDP 12％，但經濟仍乏起色）。分析家指出，今年美國企業純利較去年平均回落35％。
响熊市中有唔少反彈市，情況有D似玩過山車。你不但需要有健康嘅心臟，同時要有冒險精神，例如响人人睇淡嘅3月9日入貨，喺人人睇好嘅5月份又再減持；與响2008年11月入貨、喺2009年1月沽貨一樣。在熊市二期中必有一次（或以上）接近或略破250天移動平均線，即恒指17500點附近極有可能係呢次反彈嘅極限。Follow the Smart Money而唔係Big Money，因為大戶亦常常睇錯市。請注意，美國長債由去年12月起一直回落（太多賣家），令長期利率上升，雖然美國聯儲局2月份曾入市吸納。歷史不斷喺我地眼前重演，例如1990年日本房地產、1997年第三季開始嘅香港、2006年下半年起嘅美國，但我地往往視而不見。聖路易聯儲銀行主席James Bullard上周估計，失業率好快會見9％，並希望喺可見將來唔會超過1982年嘅最高峰10.8％。佢十分擔心類似1990年代嘅日式通縮响美國出現，而聯儲局已再冇彈藥對付通縮呢頭怪獸；前路顛簸可以肯定。國會財政預算局估計，2011年政府負債相等於GDP 54％，而畢非德估計可達80％（即到達冇經濟繁榮嘅水平）。
見底唔代表可以睇好
畢非德話，最惡劣嘅經濟情況已經過去，呢點我老曹亦同意，但見底並唔代表可以睇好。去年畢非德旗下公司投資減值160億美元，包括响愛爾蘭兩間銀行投資虧損89％（因為佢希望撈底）及2008年8月油價高峰期吸入ConocoPhillips。證明聖人都有錯，何況畢非德？我地應學習佢嘅智慧，而非盲從佢。畢非德並認為，美國房地產及零售業仍未見復甦訊號。
另一知名人士羅傑斯响去年睇淡花旗係啱嘅。佢認為，美國經濟衰退期可能長達七至八年。不過，佢去年睇淡美元證明係錯，至於睇好農產品亦錯得好交關（尤其係糖）；羅傑斯去年購入咗加拿大Agcapita Farmland及巴西Agrifirma。我老曹都係信我阿媽多D：佢認為務農嘅人世世窮！記得1973年農產品價漲價時，亦有朋友跑去澳洲買農莊，結果蝕本十幾年才打和出番嚟。今年3月9日羅傑斯喺新加坡嘅投資論壇上公開睇淡美股，起碼短期係錯。佢話自己唔係timer，而且係因為聯儲局入市買長債才令跌市延遲出現（any excuse is better than none）！請將你嘅水晶球拋入垃圾桶，承認人類係冇預測能力吧！
雪茄伏係奧巴馬其中一位經濟顧問，佢認為2月份開始嘅政府7870億美元刺激方案，已成功阻止美國經濟進一步下滑，唔需要另一方案。雪茄伏相信，經濟由今年第二季起可穩定下來，但同時認為唔少工種例如汽車製造業及金融服務業可能一去不返。即使經濟復甦，呢方面嘅就業情況亦唔會改善，情況有如1981－82年失業率一度上升至10.8％才回落，但唔少耐用品生產業工種卻一去不返（同1981年6月比較，約14％耐用品工種從此消失）。嗰D四十歲或以上失業人士即使減薪20％，仍無法搵到原先從事嘅工作，因為1981年起美國工業進入downsizing期。同樣情況2000年喺科網行業出現，受害者係嗰D從事電腦軟件嘅人才，唔少工種亦永久失去。2008年起汽車製造業及金融服務業面對同樣問題。
CBS集團主席Sumner Redstone認為美股牛市今年3月已開始。Amway創辦人之一Rich DeVos認為，今時今日應了解「Power of Positivity」（正面力量）。惠譽估計，今年全球GDP萎縮2.7％，少數例外係金磚四國，估計仍升3.2％。
湯森路透5月4日調查顯示，分析員估計今年第一季標普五百純利跌35.1％（4月1日跌36％），即分析員進一步修正睇淡。5月1日止已有三百二十六間公司公布業績，66％較估計中好，9％符預期，只有25％較估計差。
日本銀行估計，日本今年GDP萎縮3.1％，明年將恢復增長。
John F. Wasik認為，美國住宅樓價進入「迷失世代」。因為美國就業職位每月失去六十萬。接受聯儲局調查嘅銀行有45％表示已收緊樓按，而去年12月有一千九百萬間房屋空置。經過四十年美國消費不斷上升後，2008年起進入消費萎縮期，因為1965至76年出生嘅人口只有四千四百萬，加上手上財富唔及1946到64年嗰批嬰兒潮多，當嬰兒潮進入賣樓期，而X世代進入買樓期，強弱就好明顯。上述情況喺2007年已開始，相信將一直維持落去……。
投資組合策略員David Tice喺2007年10月係少數認為股市見頂嘅分析員之一，上周佢喺彭博電視發出警告，認為美國股市喺未來可回落54％，理由係長達二十五年嘅牛市早已結束。呢次熊市並非另一次Garden - Variety Inventory式衰退，而係綿綿不絕嘅衰退，即呢次衰退沒完沒了。响倫敦嘅Bill Bonner認為呢次熊市中，每次當人們開始樂觀時，股市便再開始回落。呢次亦唔例外。
智者千慮，必有一失；愚者千慮，必有一得。最聰明嘅人都有睇錯市嘅一天；最愚蠢嘅人亦起碼有一次係睇啱嘅。因此應追隨趨勢，而非預測後市。
No comments:
Post a Comment