明燈

在大反彈市，手上貨少的網友開始想入市，網友「宜家傢私」的留言有少少代表性，佢話好耐冇留言了...睇完陸sir前日o既網誌有啲感觸:「07年我儲左舊錢,，幾乎廿萬， 07年比我老豆買股仔輸到得返4萬, 果陣我衰貪心，俾佢用我d錢係三萬點入市，贏咗一陣, 之後輸到傻 (依家d死貨仲係度，呢排升咗都係得~7萬左右)」

「我在08年專心儲錢, 小注炒咗幾轉3968....最後打個和, 依家又儲到2、30萬....本來諗住'好精咁低位入市, 等3、5年升返3至4倍，到咗依家，唔計啲死貨，成個09年我仲係一股都無買.....依家又差唔多萬六點, 今次我唔敢買了。」

「陸sir, 好似我呢啲人，好話唔好聽，都幾『明燈』，一係唔買，一買就跌， 一放就升，等親巴士都要等足15分鐘 (所以我搭地鐵，最多等5分鐘)，我真係唔覺得我可以咁叻摸低入市囉.....所以都係決定聽陸sir話，逼自己個個月入一兩手2828算啦....跌得勁o既月份就入兩三手, 冇事發生就入一手....」

阿「宜家傢私」，如果你呢個浪邊日忍唔住大手入市，記得通知我地，犧牲你一個，或者可以救番好多人(講笑咋，唔好嬲)。從宜家傢私的留言分析，佢都唔係賭性好強的人，自我定位係「投資者」，所以佢07年買股仔都係俾錢老豆買，相信佢老豆係常炒之人，07年又時時話賺好多，宜家傢私又見個市咁熱，所以才俾錢老豆去炒股仔。

雖然佢講得好好笑，話等巴士都要等15分鐘，但我理解這只是自嘲之言，佢唔係特別黑，好多散戶都係咁，在大市初升之時唔敢買(初反彈時亦係一樣)，但在大市升到開哂巷時，好後悔早前無買，就忍唔住入市。股市有人買就有人賣，強手在初升時買，升到咁上下時，從知後覺的散戶入場，大戶沽貨，散戶接貨，這就是所謂「派貨」，強手離場後，即使無人隊，股市自由飛行，飛得幾飛就無力再上，自行墮落。這一切都有因有由，和運氣沒有太大關係，和散戶的行事特性好有關係。

散戶首先不是要了解股市，而是要了解自己的毛病，如果已確診自己係「明燈」之後，除咗可以在「適當」時候入市並通知網友益吓街坊之外，最好就係選另外一些入市方法。例如將自己的資金9、1分，10%資金做「投機的我」，隨自己的判斷入市，做吓實驗，睇吓死得幾慘，另外90%資金用笨笨地的方法作「投資的我」，每月買股票又得(好似宜家傢私咁在大跌的月份買多啲亦得)，買樓都得，買咗唔好短期沽，可以肯定，10年過後，用笨方法作的投資，會比投機的回報大得多。

散戶做明燈，好多時唔係佢地運氣差，而係作為散戶的宿命，佢地資料少、資金少，唔係左右大局的一群，係被人擺佈的一群，好似美國對銀行的壓力測試，各大銀行10日前已被政府通知了測試結果，都唔好講佢地在政府通報前都極有可能有內線掌握哂結果，佢地根本係先睇到答案，搶先落場炒，加上佢地資金又多，蜂擁入市已可觸發升市。散戶在場外貼試題估答案，人地知道哂試題有埋標準答案，散戶點夠人玩?

網友一丁話，看了我講散戶做「明燈」和運氣沒有太大關係，反而和散戶的行事特性好有關係。佢話:「看了你這段好有同感，有個朋友時常都係咁，佢時常都話自己黑仔，運氣唔夠，一買即跌，一放即升..........我同佢講咗好多次，叫佢了解自己的心理狀態同買賣方法，研究去改，但佢到現在都唔聽我講>< 佢信財演多過我.............我發現同佢相反做法時，我的成功率真係好高，但知道個朋友輸又心裡唔舒服.....卻又無能為力，唉。」

唔知大家有無發覺，我地身邊總有一丁講起那種朋友，如果你認為無，咁你就要小心啦，可能你就係嗰個「明燈」啦。有啲明燈衰咗會出聲，但有啲明燈只講贏錢事跡，不講輸錢慘況，所以在朋友之間比較不著痕跡。我仲發現明燈入市通常唔會馬上唔得，而係好似網友「宜家傢私」個老豆咁，通常買完會有幾日得，但係佢又唔走，到大市回頭，佢又死坐，一坐坐到尾。

老實話俾大家知，我過去都有個「明燈」朋友，佢講嘢非常大聲，買股票成日話自己睇中，我估佢買兩次有一次中(因為個市唔係升就係跌)，佢一中就好大聲，話自己點點樣分析得出入市訊號，又「陽燭」、又「通道」、又有朋友爆料俾佢聽之類，聽到旁邊一眾女士用好崇拜的眼神望住佢，佢就好滿足咁不斷講。後來我發覺，這位明燈最口沫橫飛的時日，通常唔使一個星期，佢買啲股票就由得變唔得，我就領悟出要做明燈反面的道理。

後來同一個股壇老叔父講起這些明燈事件，佢解釋話大戶消息靈通、實力強橫，係佢地帶動個市轉勢，唔係跟轉勢入市，散戶面對逆境時，在轉勢之初，會經歷「唔信、死頂、接受、反手」四部曲，開始唔信，例如佢地做咗淡倉，個市跌到好深開始反彈時，佢地通常以為彈一兩日就完；好啦，見到彈得一兩個星期，仲死頂做淡；到彈得好似樣，就開始接受去平倉；到爆哂煙花時，佢地就反手造好，咁啱爆得煙花都係迪士尼散場的時候。明燈入場遲，係致命的原因。