執平貨的一年

資金供應 左右大局

去年爆鑊的歐洲股市無大插，是金融海嘯的風眼中心的美股仲掂，杜指去年收報12217點，全年升5.5%。反映科技股的納斯達克指數收報2605點，全年累計只是微跌1.8%。

中國等新興國家在去年經濟雖然繼續表現強勁，但股市就唔掂，摩根士丹利資本國際(MCSI)新興市場在2011年跌去近20%，遠高於歐洲股市的11％跌幅，當中亞洲股市受創尤深，東京日經指數過去一年17.3%，港股跌20％，內地上證綜指更跌22%。

有不少投資老手話股市睇經濟表現、資金供應和市場心理，去年環球股市的教訓是資金供應大於一切，美股唔好講，歐洲股市無論基本因素甚至市場心理，都弱過中國好多，但由於中國大力收緊資金供應控制通脹，不止勒死內地股市，仲影響埋香港，炒股要睇住資金供應做人。

但貴金屬如黃金仲升了10％，由於黃金需求和經濟活動的關係較少，所以扮演一種無息貨幣的角色，當市場覺得貨幣、特別是美元、歐羅、日圓三大貨幣都有問題時，黃金就受追捧。

在美國聯儲局大印銀紙下，美元指數去年微升1.6％，反映美元走勢已穩定下來。去年商品和匯市的經驗告訴我們，在美國自2008年開始量寬的瘋狂刺激過後，商品市場的泡沫，在經濟需求減少下，逐漸爆破，若今年歐洲不推出大規模的量寬，環球實體經濟發展仍然緩慢，商品爆泡可能蔓延到金市，小心美元上升，黃金仲要再插，唔好以為黃金一跌就可以撈。CRB指數2009年升23%，2010年則升17％，去年開始跌8％，小心商品市場開始下行走勢。

股票賤賣　一生難求

最後前瞻2012年股市，環球投資者傾向睇淡，特別認為第1季最危險，風險源自歐洲，最大問題是歐羅有解體風險。投機順勢炒，上半年大勢仍向下，股市在年初稍升下，可能製造沽貨機會，因為歐債危機風險在過年後好快又出現，未必等得到2月首季業績期之後。但投資要逆勢，甚至唔係咁跟大隊行，回想去年證券行最樂觀的估計恒指要去番32000點，保守一點的如花旗估去年要見26500點，當時花旗認為，2010年底港股的平均市盈率僅為12.4倍，比過去平均12.8倍的水平低，代表市場過份低估了恒生指數的價值。怎知低處未算低，最後恒指市盈率跌至而家只有10倍市盈率。

有人話，10倍的市盈率都算平，唔作得準，只要上市公司的盈利下跌，股價不變，市盈率的倍數會升番。這個講法當然有邏輯，問題是香港上市公司的盈利是否會倒退？而家港股有半壁江山是內地股，我估佢地大部份藍籌內地股2011、甚至2012的盈利都有合理增長，而不是倒退。香港藍籌股難講少少，地產股最高危，好大機會盈利倒退，其他行業又唔係咁衰，所以恒指整體計成份股拉平均後盈利唔似會倒退。

若然係咁，股價愈跌，顯示市盈率愈低，若因歐債危機出現驚人大跌，可能平到你唔信，今年等到股市大跌，係執平貨的時候，甚至可能係近年最低市盈率的股市，股票賤賣，人棄我取，一生難求。當然，買了平股，佢還可以再跌，但若果你是「投資的我」，買入有賺錢前景有息收的股票，買完佢再跌，你又怕甚麼呢？你唔係基金經理，唔使每季報業績，手持優質好股，跌咪揸吓囉！