「Buy and Hold」投資策略，過去令譚甫屯賺取超過200億美元身家，亦令畢非德一度成為世界首富。隨着2007年10月美股大牛市結束，上述策略風光日子不再，應改為利用VIX去捉熊腳（7月15日極有可能係熊市二期內第二隻腳）。但捉熊腳唔係人人啱玩，各位要小心。
物超所值項目愈嚟愈難搵
世上愈來愈多「價值投資法」信徒，响咁情況下，要搵到物超所值投資項目機會愈來愈細，除非擁有超人智慧（但大部分人都冇）。
換言之，美國6月份CPI雖然上升5％，但人民面對係「通縮」！曾經歷過1997到2003年香港人應該最明白，每年樓價回落10％合共六年滋味，消費力自然萎縮，相若環境將喺美國重演，再加上金融業大裁員（金融業係OECD國家人口中最高收入行業），美國人將面對收入下降。所以我老曹擔心係美國同歐洲進入九十年代日式衰退，最終拖垮油價甚至金價，而毋須再要聯儲局加息，只有新興經濟國先至係進入滯脹。
上周由美國證監限制拋空而引發三天補倉潮，如客觀形勢未改善，完成補倉後，美股成交將十分靜。五窮、六絕、七翻身，到7月份股市已累積唔少淡倉（7月15日VIX一度見30），引發平倉潮並唔奇。問題係7月完成平倉後，8月及9月業績公布期股市又點？
VIX（喺美國CBOE交易）已愈來愈普及，當佢上升，代表投資者驚慌；當佢回落，代表投資者信心十足。職業投機者便反其道而行，今年5月喺孟買股票交易所更引入印度VIX。CBOE同台灣交易所、德國Eurex及Euronext達成協議，引入上述股市VIX。市場亦開始計算原油、黃金、外滙及利率VIX，形成全球一片VIX熱。VIX最後命運會否一如其他分析工具，因太普及而漸漸失效？
No comments:
Post a Comment