美股製造假雙底

聯儲局再注資2000億美元去穩定信貸市場信心危機，並首次以國庫券交換次按債券；另獲歐洲及加拿大央行協助注資450億美元入佢地自己銀行體系。上述措施令道指出現五年內最大升市，媲美1月份八天內減息1.25厘，令道指1月22日止跌回升；幕後策略員有可能係財長保爾森，佢趁住股市拋空者眾多，殺淡友一個措手不及，為美股製造「假雙底」走勢，企圖利用股市升降反過來影響美國經濟表現。上述行動類似呆壞賬將「國有化」，係咪有用？有待進一步觀察。我老曹意見係：殘酷熊市如果真係咁容易解決，1929年聯儲局及1990年日本央行係咪豬咁蠢？美股同港股已確認熊市；滬深三百指數50天線同200天線天天在接近，唔排除4月初獲確認。世界各地股市真係熊蹤處處，唔係咁易「殺牠死」。