反彈市隨時結束

3月26日，恒指再升152.49，收22617.01。3月期指低水，升145點，收22615點；4月期指升142點，收22595點。小心反彈市隨時結束。
　　
死貓式反彈居多
上周JP摩根大通宣布以每股2美元收購貝爾斯登而引發全球金融股大拋售；本周忽然提價到10美元，令周一金融股全面上升。不足一星期，點解變化咁大？由於貝爾斯登管理層同意將手上九千五百萬股出售畀JP摩根大通，加上已持有一億四千五百萬股，即4月8日後，摩根大通最少持有貝爾斯登39.5％控制權。分析家認為，以每股10美元收購，JP摩根大通應該冇其他對手矣。
　　
呢次金融股上升，到底係火鳳凰抑或死貓式反彈？
一、去年10月道指金融分類指數所形成嘅下降軌至今未破。
二、成交額未見大幅上升。
三、由去年7月金融分類指數開始回落，反彈38.2％，阻力係465點，至今亦未升穿。
四、美國Broker╱Dealer指數由於過分拋離下降軌而反彈，證明只係死貓式反彈。
五、由於短息低於長息，對銀行賺取息差有利，即客觀環境在改善中。
六、經濟情況在惡化中。大部分企業上半年業績皆不理想，短息大幅低於長息，代表可見將來經濟仍在惡化，但六至十二個月後情況會改善。
　　
1990年2月Drexel Burnham Lambert出事，六個月後金融股復甦。呢次貝爾斯登2007年3月出事，今年第四季金融股復甦？1998年9月長期資本管理出事，美國金融股亦响六個月後便復甦。

聯儲局將失減息能力
聯儲局搏命減息，令短期利率急跌，但三十年期樓按利率不跌反升！減息嘅目的係鼓勵市民借錢買樓，但三十年期樓按利率上升，卻打擊買樓欲望。睇嚟長達二十五年嘅信貸上升周期已响去年第四季結束，信貸擴張期已經完成，而信貸收縮期剛開始。投資者尋求嘅係資金安全性大於保值，寧可忍受貶值嘅代價，上述行為係引發信貸壓縮（credit crunch）嘅理由。呢個情況九十年代响日本出現，1997年8月後响香港出現，去年10月起亦响美國開始，最後必引發通縮（而非通脹）。雖然各國央行曾努力阻止通縮出現，但日本銀行唔成功，香港政府唔成功（1998年9月曾動用過千億元資金買股票，令股市上升，但一樣解決唔到香港通縮問題），美國聯儲局可以咩？地產泡沫爆破後嘅影響，可用邊個更大嘅泡沫去抵銷？金價由3月17日1032.7美元一盎斯急跌至3月20日905.53美元，係咪一葉知秋？ 4月份將係聯儲局最後一次減息（估計半厘），之後聯儲局便失去減息能力，到時美國會否開始進入通縮期？
　　
當金融市場面對信貸壓縮，新興市場卻面對食物供應短缺！全球糧食存量跌至1970年以來新低，部分理由係新興國家人民所需嘅糧食卻被OECD國家用作生產乙醇（一架汽車耗油量相等於十六個人嘅口糧）。去年美國種植區已擴大到九千萬英畝，係1944年以來最大，但40％玉米用作生產乙醇，刺激大部分農產品價格上升，卻又無力壓抑油價。令人洩氣嘅係，烏克蘭2001年通過法例唔准農地易手（無論係本國人或外國人），目的係阻止農地流失，結果卻造成大量農地荒置。擁有農地者自己唔想耕但又不能賣出去，只有丟空。烏克蘭係世界知名嘅糧食產區之一，2001年起受制於法例，約有二千三百萬公頃農地荒廢，令人扼腕。
金價或跌穿850美元
　　
對OECD國家人民而言，影響CPI最大因素唔係食物價格或油價，而係樓價（租金）及勞工成本！大部分OECD國家企業勞工成本佔總開支四分三，租金約佔八分一，其餘加起來才佔八分一。响環球化壓力下，OECD國家工資漲唔起來，因此CPI升幅有限。
　　
黃金70％用於珠寶業，印度更係最大市場。去年第四季印度珠寶需求大降64％，即大量黃金自去年第四季起流入投資客手中，响上述情況下，高金價可維持幾耐？（黃金係美元嘅死敵，而非保值工具；過去七年推高金價係美元滙價下沉，而非CPI大升！）　　

美元可分為三段大跌期：
一、1971至78年；
二、 1986至95年；
三、2001年至今。
第一次共八年；第二次係九年；第三次至今已超過七年。1971至78年美元貶值，加上CPI大幅上升，令金價大升。1979年美元升值，但金價仍升，理由係利率低於CPI升幅。1986至95年美元滙價亦大幅回落，但CPI升幅唔大，利率高於CPI升幅2厘或以上，金價升幅有限。2001年至今美元貶值，去年CPI才大幅上升，理由係利率低於CPI升幅2厘嘅結果。
　　
近年投資市場有大量對沖基金出現，佢地利用槓桿造成某一類項目短期供求唔平衡，例如去年8月17日恒指19386點急升上10月30日31958點，爆炸性上升引發散戶（甚至大戶）跟風，然後佢地飽食遠颺，再找尋另一目標，例如油價同金價，同樣都係製造爆炸性上升，睇嚟另一次飽食遠颺行動又開始……。佢地追求嘅唔係長期增長，而係爆炸性上升，响最短時間內賺取100％回報或止蝕離場。有人十分討厭佢地，稱佢地為國際大鱷甚至係市場操控者。金融市場唔係講道德嘅地方。小朋友可以同情小牛、小羊、小兔，討厭獅子、老虎、豺狼；年紀漸長，明白猛獸係保持生態平衡嘅方法，冇獅子、老虎及豺狼，地球上嘅草早已被吃清光；有咗獅子、老虎、豺狼，便限制咗牛、羊及兔嘅數目，達致平衡。對沖基金嘅作用亦係咁（如佢地睇錯市，付出嘅代價就係死亡）。

貝南奇未能以泡治泡
1974年12月至76年3月美股大升，然後牛皮到1977年3月，再回落到1978年初，然後連升三年，到1981年爆煲；2002年10月至07年 10月走勢亦大同小異。至於2007年10月以後表現會否同1981至82年相似？我地不妨細心觀察。美國上一次黃金歲月係1949至69年，經濟繁榮而 CPI升幅唔大，呢段日子美國由擺脫戰爭恐懼，到順利發展經濟，直到1970、71年美元出現危機才結束。
　　
最近一次黃金歲月，由美國創新科技加上中國等國家走向改革開放經濟所引發，由1982年開始，到2000年科網股泡沫爆破結束環球化所帶來嘅繁榮為止，然後由格蛇利用流動性過剩去創造2002年10月至07年10月嘅小陽春，最後次按危機爆發而引發2007年10月起嘅股市大幅回落。貝南奇透過壓抑美元滙價同減息，希望製造另一個原材料泡沫（以石油、黃金及原材料價格為首），擔心呢個泡沫今年3月已爆破，美國黃金歲月再無法維持，因為減息只能令信貸成本下降，卻無助重建信貸信心。
　　
1980年隨着中國將深圳變成經濟特區，香港工業開始內移；珠三角工業以香港廠商為基礎。八十年代香港經濟踏入轉型期；製造業工人（1980年超過一百萬，佔當年就業人口超過三分一）漸漸被服務業吸收。香港負責接單、保險、運輸、訂購原材料、安排財務等工作；珠三角係工廠區，負責生產。香港製造業內移，除咗初期造成工人大量失業外，後期反而成為受惠者。
中台關係唔似中港關係
　　
1980年中國極需要香港提供各種服務，但今年中國並唔需要台灣提供任何服務。今年台灣用乜嘢條件吸引中國大陸資金投資台灣？除咗旅遊探親人數可能由2007年嘅幾十萬到2009年嘅幾百萬外，其他方面受惠唔大。如好處只局限於旅遊業，便只能令台灣GDP每年增長率多咗0.5％而已，係咁多！
　　　　
馬英九上台後，中台關係會否變成中港關係？除咗地理因素（香港同珠三角只係一河之隔，台灣卻係一個海峽）、政治因素（香港要回歸，今天已係中國一部分；台灣一直拒絕統一，國民黨只主張不獨不統），仲有時間因素（1980年中國百廢待舉，只有三廉優勢：即廉價勞工、廉價土地、廉價資源；其他一切皆依賴香港。今天中國其他服務業已發展起來，反而三廉優勢漸失）。