美國,中國A股踏入熊市

美國去年第四季GDP增長率只有0.6％，係五年內最差一季（第三季升4.9％），大摩估計今年第一季GDP係負增長0.7％。愈嚟愈多分析員相信美國正步入衰退期。　　

高盛估計，中國A股可能延續去年由高點下跌超過30％嘅趨勢，估計今年上市公司純利平均升幅只有15-20％，而非分析員估計嘅31％。去年人行六次加息、今年兩次上調銀行存款準備金率，並可能進一步加息；加上2月份貿易順差較去年同期縮減64％及人民幣短期內將升穿「七算」（估計年底見6.3元人民幣兌1美元），大大削弱中國產品出口競爭力。美國需求減弱，如中國GDP增長率由去年嘅11.2％降至今年嘅8％，可引發A股一個大熊市。

外企紛紛逃離中國　　
馬英九希望中國大陸帶動台灣經濟復甦；反觀中國踏入今年卻面對「三缺四漲」局面（即缺乏勞工、缺電、缺地；油價漲、原料漲、工資漲及人民幣值漲），令勞動密集型外資企業加快轉移，但唔係流向中國中西部地區，而係流向越南、老撾、柬埔寨等東南亞國家。加工貿易工業外流，造成中國產業內迴圈「斷鏈」，因為高新科技亦需要加工貿易產品協助才能完成產業鏈。中國政府希望加工貿易內移，但外資卻在外移，因呢次中國政府冇向中西部地區提供優惠去吸引外資企業轉移。响「三缺四漲」壓力下，珠三角及長三角地區產業面對「斷鏈」嘅威脅。除上述威脅外，另加兩稅合一、出口退稅率下調、勞動合同法實施及環保條例加強，令唔少台商跑去越南、緬甸、印度等建廠。响2005至07年，台商喺越南第一大投資者！鎰勝電子科技（昆山）副董事長楊登輝話，三年前已投資越南，依家利潤率係中國嘅二點五倍，亦冇興趣到中國中西部投資。假設人民幣見6.3兌1美元，相信珠三角同長三角將出現大量倒閉潮。逃離中國嘅唔止台企，仲有港企同韓企；韓企更認為，中國勞動密集型企業已進入黃昏。　　

中國經濟嘅外在因素同內在因素都在惡化中。今天中國經濟抗衰退能力較1997年好許多，但出口佔中國GDP 36％，亦較1997年高許多。依家中國生產全球70％ T裇、60％記事簿、45％船隻；製造業方面投資佔中國固定資產投資31％，並間接影響道路、海港、電廠、工業邨等投資。製造業共聘用一億二千萬工人，佔城市就業人口50％（其中七千萬係低薪工人）。美國、歐盟及日本佔中國總出口60％。如中國出口增幅由去年20％降至今年10％，可令GDP升幅由 11.2％降至9％，投資者宜小心。　　

中國A股已陷入深幅調整，系統性風險驟增。著名經濟學家巴曙松話，中國股市系統性風險上升，迫切需要推出股指期貨等風險管理工具。外在因素係美國次按危機影響下，經濟出現明顯放緩迹象，令外貿需求大幅下降，意味中國出口升幅下降，令外需拉動經濟嘅增長方式面臨嚴峻挑戰。內需方面，一場雪災暴露出基礎建設及配套設施不足，加上CPI居高不下，緊縮政策為宏觀調控嘅主要旋律，响銀行收緊信貸下，引發上市公司向股市集資，改變股票供求關係。由於中國股市唔發達、唔靈活及唔完善，一旦面對外在及內在因素衝擊，所面對嘅風險較成熟市場大得多；再加上大小非流通股解禁，而且中國股市體系十分單一（唔容許拋空），亦冇有效嘅對沖工具（如期指），好容易出現系統性風險（例如狂升或暴跌）。　　

今天日經平均指數收12604點，較去年6月20日18297點下跌31.11％（今年至今下跌17.66％），已成為美國次按危機嘅第二大重災區！至去年12月止，日本三菱、瑞銀等六大銀行集團响美國次按貸款中損失超過5000億日圓，業內人士估計，至3月31日止財政季度結束，未來公布嘅損失將遠高於此。3月 24日官方公布2月份破產企業多達一千一百九十四家，涉及負債36萬億日圓，較去年同期上升8.3％及26.2％。滙豐銀行估計，今年第一季日本工業生產總值將較去年同期下降2.5％。　　

雖然今天金價反彈，只要唔高於1036美元仲係睇淡，並形成下降軌。唔好相信滯脹論，近期金價、糧食價、原油價到銅價上升，炒賣成分好高，此乃對沖基金嘅搵食行為，正利用聯儲局減息到2.25厘（有可能進一步減至1.75厘）嘅心理因素進行投機，小心狂升之後就係暴跌。所謂「彈散彈散」，唔反彈又點可以散？

東歐醞釀金融風暴　　
熊市一期反映嘅係投資者失望情緒，通常跌得快且急；熊市二期反映投資者冇晒希望，通常係上落市；熊市三期投資者進入絕望嘅日子，可出現惡性拋售，然後又物極必反。股市係唔會長期停留响合理O（十二至十八倍），一定由偏高走向偏低（八至十二倍），然後又由偏低走向偏高（二十二倍或以上）。　　

同1997年唔同，當年美國經濟仍處繁榮期，亞洲各國貨幣貶值後，透過出口美國可重建經濟繁榮；今天連美國亦陷入衰退邊沿，如出現東歐金融風暴，真係唔知點樣打救？因為美國亦變成泥菩薩過江（自身難保）。美元滙價下跌大大打擊東歐各國出口能力，令收支赤字擴大，一旦守唔住而引發東歐金融風暴，咁就大件事。

自由經濟容易極端走向極端　　
政府只能為企業提供良好營商環境，卻不能隨意操控經濟。1990年日本政府唔可以，1998年香港特區政府唔可以，2007年美國政府唔可以，2008年馬英九亦唔可以。中國政府1949年成立之後花咗三十年時間，到1978年才宣布改革開放政策（有中國社會主義特色嘅市場經濟）。自由經濟嘅缺點係由一極端走向另一極端而引發泡沫，此乃避無可避嘅事，因為市場除由供求決定外，更加入心理因素，而貨幣政策及財政手段更容易將事物推向極端。　　

今天滬深三百指數跌4.23％，收3748.92。本周50天線已跌穿200天線；換言之，A股指數已有一隻腳跨入熊市。中石油A股已逼近發行價，中國太保更跌破發行價，係第一隻跌破發行價嘅新股；加上近日成交量不振，滬深A股牛市已於去年10月死亡。　　

雖然美國減息，但冰島加息1.25厘、至15厘去支持克朗；波蘭、羅馬尼亞亦宣布加息0.5厘，至9.5厘去支持列伊（Leu），仲有斯洛伐克、捷克、匈牙利、拉脫維亞、立陶苑、愛沙尼亞、土耳其等。呢D國家收支赤字大增，貨幣面對好大壓力。例如保加利亞及拉脫維亞收支赤字相等於GDP 20％，羅馬尼亞亦達14％。一旦全球流動性過剩情況改變，可引發「東歐金融風暴」（類似1997年7月亞洲金融風暴），出現貨幣大幅貶值！