1968年我老曹剛入行之時，對股票其實一竅不通。第一隻買入股票叫城市酒店。至於點樣將5000元本金在五年內（1972年）變成50萬元？我老曹亦記唔起矣。並唔係自己較別人聰明，亦非我老曹曾接受高深教育，而係剛剛趕上香港股票市場最大一個牛市，恒生指數1970年由100點升到1973年3月1774點。當年認識一位十分有分量股票分析員就係森池兄，佢英資證券公司打工，曉分析，因此曉驚。1972年底森池兄同我老曹同時睇淡，在1972年底恒生指數1100點便沽清貨，然後雙雙睇住1973年1月至3月恒生指數由1100點升到1774點。
由此證明，賺錢同高深教育並無關係。我老曹住5000元賺到50萬元理由係無知，人炒自己又炒，呢段日子相信激死唔少有學識之士。認識森池兄之後，我老曹曉驚，反而賺少60％，不過亦因此避過1973年3月至74年7月大跌市。
1974年7月恒生指數回落到450點附近，我老曹以為見底，加上當年我老曹唔識揀股（stock-picking），決定買入當年炒股和記企業（今天和黃前身），而森池兄則選太古地產（即今天太古前身）。我老曹將50萬元分五次入市，由7元開始、6元、5元、4元、3元每次投入10萬元左右買入和記股份，結果十萬股和記，然後睇住佢跌到每股1.1元，全副身家只值11萬元；反之，森池兄所選太古地產因仍派高息，所以跌幅唔大，損失十分有限。呢一役教曉我老曹要做好資料分析，1974年底我老曹失業後便加入《信報》，1975年起便痛下苦功鑽研投資技巧，唔再盲目相信運氣，開始作理性分析。
今天我老曹投資策略有：
一、止蝕唔止賺；
二、有智慧不如趁勢；
三、溝上唔溝落，
都係當年學曉，一直沿用到今天。亦有D情況，有些股份回落15％止蝕後，便掉頭上升，止蝕變成錯誤決定。不過，人生充滿矛盾及無奈，在整個人生過程中，犯錯係免不了.
成功背後是冗長乏味的工作
我老曹今年快六十歲，從事投資已四十年，雖然唔敢誇口「master of the market」，但總算明白乜係「投資」。順勢之時，錢真係會自己流入你袋；反之，逆勢之時，無論你幾努力，結果一樣輸多少。漸漸明白「謀事在人，成事在天」道理，人算不如天算，唔怕你機關算盡，你係鬥唔過個天。
大部分成功者性格都係嚴守紀律，唔任意妄為，同時持之以恒、唔冒大風險。獲少利之時學曉咬住唔放。大部分成功故事背後，都係冗長及乏味工作，而非投機倒把結果。如能養成獨立思考的習慣，以及培養出同群眾持相反意見勇氣，你已成功一半。
其後我老曹認識郭得勝先生，佢教曉我老曹「三七分」，即睇好之時70％股份、30％現金，睇淡之時70％現金、30％股份，做人唔好太極端。之後遇上1982年北京宣布1997年收回香港主權，我老曹便開始採用佢「三七分」法，把30％資金投資海外、70％留在香港；到1997年改為70％投資海外、30％投資香港；2003年才把70％資金投資香港、30％仍留在海外。去年10月改70％現金、30％股票。呢招「三七分」法十分好用，不但避免自己諗法走向極端，同時為我老曹帶來唔少財富。
No comments:
Post a Comment