美股方面，2000年殊仔上台後提出減稅方案（股息稅由35％降至15％，資本升值稅由20％降到15％，2003年生效，到2009年12月31日後失效）。
除非明年新總統上台後立即通過臨時減稅法案加以延長，不然2009年後美股將大受壓力，因上述減稅方案係令美股由2003年起上升嘅其中一項重要因素；上述法案卻喺二十個月後自動失效，將係2009年後美股另一威脅。响美國政府財政赤字咁龐大嘅情況下，又有邊位新總統有吉士一上台便要求將上述減稅法案延長而同時獲國會通過？2009年同2002年環境唔同，當年因發生2001年「九一一慘劇」，人人憂慮美國出現衰退。當年客觀環境有利通過減股息稅及資本升值稅法案（何況係臨時）；依家客觀環境卻大大唔同。
拉斯維加斯嘅金沙集團（全球最大賭業集團）宣布，今年首季虧損1120萬美元或每股3美仙（去年同期獲利9090萬美元或每股26美仙）。該公司投資120億美元喺澳門興建酒店及賭場。金沙今年首季收益雖然較去年同期上升 72％，達10.08億美元，但仍未符合分析員事前估計嘅12.2億美元。消息公布後金沙股價喺場外交易跌7.22美元，至69美元；今年金沙股價已回落 26％。
今年1月金沙集團响拉斯維加斯開業嘅Palazzo入住率只有79％，較拉斯維加斯另一酒店威尼斯人91％（一年前99％）為低，主要受高油價影響，令揸車去拉斯維加斯賭嘅人數較估計中少。
2004年响澳門開業嘅金沙酒店EBITDA亦跌36％，至6530萬元，主因係被去年8月開業嘅威尼斯人搶走部分VIP客戶，以及去年5月新濠國際開業嘅Crown酒店影響。今年4月23日澳門政府宣布停發新賭牌，維持只有六個，因回歸後至今賭場數目已增加超過一倍，至二十九間，而且未來仍然在增加中。
金沙集團亦有投資新加坡聖淘沙嘅賭場，2009年開業，涉及資金40億美元。另喺美國賓州伯利恒城投資一間賭場，涉及投資8億美元，並有意用7500萬英鎊購入倫敦賭場Les Ambassadurs。
過去一般人認為生意淡薄，不離賭博。睇嚟世界性賭業一樣受經濟吹淡風所影響！
No comments:
Post a Comment