調整未必要價格跌

希臘與國際債權人的談判尚未達成協議，令該國就獲取三巨頭──歐盟、歐洲央行及國際貨幣基金組織（ IMF）的第二輪 1300億歐元援助貸款仍存在變數，歐元區集團主席容克警告，若然希臘不接受必要的改革措施，將不會有新的援助方案，這意味希臘 3月份便要宣佈違約。

不過，股市的反應非常平靜，可能係投資者睇死最終都會達成協議，難道過去兩年各方費盡工夫頂住希臘，到緊急關頭先會畀佢違約？況且去年的大跌市中，大家基本上已將希臘破產的情況計算在內，所以消息並未對市場造成任何大震盪。
港股連開兩日陰燭，暫時受制於 250日線，升到 21000點邊緣，動力似乎有所減弱，而資金也轉至集中炒賣一些基本因素欠奉的小型股身上，有點禾雀亂飛的味道，根據過往經驗，這好多時預示升勢或已到水尾，就算後市再升，都要先抖抖氣作出調整，不過嚴格上來說調整唔一定要價格下跌，有時大戶亦會使價格橫行整固，以時間來消秏價格下跌的壓力。

聰明錢吼太陽能股所以投資者不要一廂情願，見累積升幅已巨，諗住調整都一定有返咁上下深，唔跌返一千幾百點都唔入貨，在資金推動下，買貨機會實際上可以稍瞬即逝，前日本欄提及近期的壞消息股收復失地的速度令人驚嘆，便可知市場刻下對股票的需求有幾咁龐大，為免蘇州過後無艇搭，投資者最好勤力點做功課找出心水對象，隨時預備出擊。
大市或者會吽多陣，這其實是炒股不炒市的最好時機，筆者近日較為喜愛的要數太陽能股，一來圖表有勢，二來消息面上充斥着歐洲國家削補貼、產能過剩、產品價格易跌難升等利淡因素，股價卻不跌反升，以此推斷，夠膽向其投信任票的應屬聰明錢，大可望多幾眼。