股神忠告

股神巴菲特上周末發出致股東的信，再次令佢成為話題，今次最惹人注目的是美國樓市。

股神在股東信中，承認睇錯美國樓市，去年預測樓市在一年之內復甦是「致命錯誤」，佢話旗下巴郡公司有5項業務與樓市有直接關係。佢認為，美國樓市仍未擺脫低潮，與樓市有關的業務仍「在急症室中」，但巴郡其他業務已經「全面康復」出院。但他無改對美國樓市長線復甦的預期，話美國每年新屋動工的數目為60萬間，遠遠低於每年新增家庭數目，相信對房屋的需求將持續增加，樓市最終可以走出谷底。

股神之後接受CNBC訪問時，再講到相關問題，主持人Becky Quick講到近期美股升到4年高位，不忘提番2008年股神在紐約時報撰文話「買美股，我都買」，當時杜指只有9000點，如今已經行好遠(不過佢無提到股神話完買之後，杜指在09年3月跌到6500點)，主持人問股神點睇而家的股票，問而家仲係唔係買股的時候?

股神答話:「唔，買股是一門生意，問題是你點都要做點投資。你把錢放在袋內，都係投資，不過係零回報的投資。同樣不幸地，你把錢放銀行，同樣是零回報。或者你買美國國庫券，一樣係投資在零回報的東西上。如果持有股票一段長時間，持有一個分散的領導性公司組合，它們會大幅跑贏紙幣或無生產力的資產如黃金，但這不是未來三個月或半年的預測。但無可置疑地，持有一流質素的生產性生意，街外有千百種這樣的生意，你在一段時間，可以得到複利的回報。它們可以派錢給你(派息)，或者再投資在生意上(巴郡就是不派息的公司，以節省股東的利息稅)，它們再投資令你的權益增值。所以股票相對於其他資產，仍然相對便宜。

股神講講突然彈多句:「但美國的房屋如今同樣便宜」。佢話如果有方法可以買幾百幾千間屋，同時有方法管理的話，他會大手買入，同時以非常非常低息去借按揭。借30年的按揭俾你的對手等如沽空美元，如果將來利率再跌，你下個星期可以轉按享受低息，但如果按揭利率其實太低(美國有長年期定息按揭，現利率約3厘多)，借錢俾你的人就維持30年，所以買樓是非常吸引的投資。所以股神話如果佢係後生仔，佢都會借30年按揭去買間樓。

香港無長年期定按，樓價又高得多，所以以上分析不適用於香港。但長股票的理論永遠用，買有息派的一流質素公司，長線會跑贏乜都唔買，或者高價買黃金、買貴樓。

最後睇下外圍，希臘上周雖然成功爭取到第二輪「救命錢」，緩解即時爆煲危機，但「大戲」繼續Encore。評級機構標準普爾將希臘「CC」長期主權信用評級和「C」的短期主權信用評級下調至「選擇性違約」(selectiveDefault)。標準普爾稱﹐希臘政府在某些系列主權債券的文件中以追溯方式加入集體行動條款，令債券原有的條款發生重大改變﹐因此構成了不良債務重組。

歐洲股市低開，德國和法國股市盤中跌幅超過1%，收市微跌。歐元兌美元匯率一度跌穿1.34水平。少分析指出許多人見到美股今年升勢出乎意外咁勁，都應該係時候調整，都想趁低入市，點知個市升下高些，升下又高些，即使抖氣，都係幅度有限，標普500指數踏入2012年，到現在都從未試過調整超過1%。大市跌唔落去，除了美國聯儲局維持超低息至2014年以外，歐洲大放水亦係一個主要原因，繼去年聖誕前夕歐央行貸了4890億歐元俾銀行，明天又會再掟多4000億至1萬億低息歐元入市場。咁多錢一下子流出街，會去邊？相信做投資或買樓唔會好多，大部份都會流入股市搵快銀。手執巨款的大戶見低就吸，所以就撐住個市，個唔落去。