呢個世界投資不容易，因為個世界係唔正常的，經濟增長唔正常，資金供應唔正常，所以正常人用正常的眼光去買賣股票，好易輸錢，或者用無咁正常的頭腦去想買股，會有所斬獲，呢種唔正常的思想係指你估股市會好時，股市其實會轉壞，你估股市會壞時，其實股市在好轉中。
上周四聯儲局決定將低息期由2013年年中，推遲到至少2014年年底，聯儲局主席伯南克打埋開口牌，話若經濟唔好會實行第三輪量化寬鬆(QE3)。我認為聯儲局除咗覺得美國經濟差之外，更可能是為今年11月奧巴馬競選連任鋪路，如果3月宣佈稍後開始第三輪量化寬鬆，進行半年，一直寬鬆到10月，製造投資市場的繁榮景象，是否可以將奧巴馬送入白宮呢？唔好覺得我誇張，奧巴馬所屬執政民主黨在2010年11月2日的美國中期選舉中失敗，失掉了對眾議院的控制權。就在中期選舉後的第二天，美國聯儲局啟動了第二輪量化寬鬆貨幣政策，宣佈在2011年上半年購買6000億美元債券，伯南克配合民主黨政府重振經濟的動機，十分明顯，今次會不會又故技重施呢？
QE改變市場氣候
好多人話QE無用，我就話不要小看QE，雖然QE未必可以救起美國經濟，但QE卻是投資市場的「遊戲改變者」，起碼可以改變一年半載的中期氣候，大量資金流入美國市場，無嘢好做，就去炒吓股。睇吓歷史經驗，2009年3月杜指插穿6500點跌到谷底，同年3月18日美國聯儲局就宣佈首次實施量化寬鬆貨幣政策，購進數額驚人的1.15萬億美元的各類債券，杜指隨後在2009年第2、3、4季就由谷底急抽而上，升番到10000點樓上。到2010年，QE效應淡化，美股由上升市變番上落市，在10000點至11000點浮游，到呢年年底，聯儲局在11月再宣佈2011年上半年進行第二輪QE，要購買6000億美元長期國債。第二輪QE再將杜指拉高一個台階，在2011年由11000點升上12800點的高位。到8月美國聯儲局話明唔搞QE3，杜指就迅速轉弱，在去年第3季反覆試底。從美股走勢，充份睇到QE對股市的影響。
美國QE對中港股市的影響，在2009年都有大拉升作用，但到2010年尾開始走樣，內地上證綜指在2010年底已明顯弱過美股，2011年開始，港股走勢跟住內地轉弱，理由好簡單，2010年年底美國雖然再放水，但內地卻因為高通脹開始收水，一加一減，中港股市表現就打咗折扣，到去年下半年美股因為無QE轉弱，中港股市就弱上加弱。
若以此邏輯推斷，美國若再推QE3，或者好似債券大王格羅斯所講，推到QE4、QE5都救唔到經濟，但QE3一出，水流入銀行，股市又會谷起跑一段，出現經濟差股市照升的局面。今次和去年頭最大不同，是美國放水時，中國不會收水，估計會稍稍放水(假設內地通脹不會馬上掉頭急升)，對中港兩地股市比較有利。
消費股避險過龍
講兩句歐洲，其實也在放水中，去年11月歐洲央行決定放出4800億歐羅1厘低息的3年期貸款，雖然不是直接由央行買債券的量化寬鬆，但同樣有央行放水入市場的效果，歐洲央行話今年2月會再推第二批低息貸款，即係話會再掟錢入市場。整個西方世界陷入經濟差、水頭多的局面。
有聯儲局長期低息和可能實行QE3這個「遊戲改變者」，睇股市不能太淡，慎防股市反覆反彈向上，投資者並慢慢從防守性股份進入風險股。
過去市場認為防守性股份是公用股，炒起內地電訊股，都係同一概念，認為市場水緊不會影響電話這種消費，中移動歷史市盈率(即按2010年盈利計的市盈率，即將在2011年盈利公布後按新盈利更新)11.2倍，以中移動的市場佔有率和現金水平，呢種市盈率都未算貴，但消費股就唔係同一回事，唔知點解消費股好似變成防守性股份一樣，在去年跌市中創晒新高，如鞋股百麗去年7月創了17.54元的高位，近期急跌後，現價12.3元，歷史市盈率仍有25.7倍，以一個競爭門檻較低的行業計，仍屬偏高。
大股東減持有啟示
另一隻惹起我留意的是食品股康師傅 ，去年12月中，高盛睇好康師傅，話預料今年非酒精包裝飲料及包裝食品業務前景正面，預期收入增長將加快，以及毛利回復，將康師傅納入亞太區買入名單。到本月6日，瑞銀亦將康師傅升級至「買入」，目標價由22.2元調升至30.6元(上周五收22.8元，現價歷史市盈率高達34.3倍)。有趣的是康師傅大股東兼主席魏應州及執行董事魏應交於1月17日，在市場外以每股22.75元減持494.9萬股，套現1.1億元。公司在3月底公佈去年業績，大股東在公佈業績前兩個月不能買賣，所以現在差不多係業績公佈期前大股東最後沽貨期，大股東沽貨，一係好等錢使，一係覺得價錢高。
你可能會問，點解證券行仲唱好，大股東會認為股價高？我估大股東唔係在好市時去沽，好難沽貨，所以有「大戶沽貨，愈沽愈高」之說。但點睇都好，公司業績都可能有隱憂，去年食品原材料急升，但即食麵等食品零售價卻受官方控制，毛利受損，業績有壓力，康師傅34倍市盈率，真係貴咗少少。
證券界擔憂風險，將資金泊入較「保險」的消費股，有啲避險避過龍的感覺，到市場風險胃納回升時，消費品可能會落後於風險股。
近期香港股市急升了1400點，升得多調整唔出奇，升得太急的股份更可能會回吐較多，所以不是說中線睇好，股市短期內就唔會跌，你睇上
No comments:
Post a Comment