蛇變象又有新招

平保可能通過換股形式購入深圳發展銀行的股數約2億股，涉資逾43.5億元人民幣，昨日繼續停牌。「兩保六行」除中信銀行逆市升外，其餘向下，國壽跌1%、財險跌0.7%。

昨日上午跌得好急，由高位跌到低位一個鐘頭多啲，當時真係有少少災味，唔止大股跌，本來炒得好好地的細股，當中不少立時散晒，10格、20格係咁隊落去，充份顯示好多人都係以「一唔對路就閃」的精神去炒股。

不過，其後個市一直反彈，到下晝3點多彈到高位，本來都好似呢幾日的格局，好似一個V形咁上番來。不過最後又軟番200點，破壞咗本來幾完美的V形走勢，多少反映尾段沽壓都唔細，不少有貨者甚至唔想揸過夜。無論如何，當昨日個市上落市咁炒，在上午跌到好甘時夠膽入市接刀，結果大市果然跌定咗，守到下午炒高時走人，都可以執番300、400點。

大批股變相賣殼
中環茶友話，早兩日個市調整時通常唔穿18000點大關，昨日最低見過17710點，呢啲位唔好再穿，若果殺穿埋向下插，守唔住17000點兼且跌咗上唔番去，小心要展開一浪調整。好似昨日插完又抽番，又唔係咁大不了。

若講炒股昨日隻中策集團真係炒到飛起，事緣呢隻嘢公佈配股集資78億元，無錯，的確係78億，唔係7.8億，隻嘢前日市值只有2.5億，竟然話要配股集資78億，扣埋使費集資淨額有76億，真係夠晒驚人，若成事公司等如大咗20倍，原有佔100%股東的股權，攤薄到只佔4.6%。呢一招唔係蛇吞象，係蛇變象，過往好少見，佢公佈得出來要批咁多股，令人相信佢唔係吹水，估佢有可能已經搵咗投資者落疊，先至咁公布咁大野心的配股計劃。

中策前日股價0.121元，配股價0.1元，折讓17.4%，中策雖然無公佈有乜投資計劃，但話要集78億，好易令人信佢有大計，所以好易炒起，上午已經升咗30幾%，下午愈升愈有，結果大升110%，收報0.255元，一日升一個開有多，成為升市冠軍。

中策咁搞若能成事，已經係變相賣盤，要用新股東放入去的78億搞重大新項目，由於誰來入主唔知，新項目係乜又唔知，除非有知情者炒內幕消息，跟風者入去買都係膽博膽，博有大嘢跟尾，最後搞出一個大項目借殼上市有之，搞搞吓話配售不成瓜咗亦得，開大開細完全唔到老散控制，行入去炒真係「盲俠聽聲劍」，亦唔知監管機構對呢個咁有創意的集資計劃點睇。

如果個市繼續好，假亦可以變真，如果個市唔掂，真嘢集唔到資亦可以撤退變假嘢，唯一肯定是個市熱度提升，開始有人搞吓大劑嘢，好此道者真係愈來愈刺激啦。

呢啲市睇基本因素可以合埋眼唔使睇，例如前滙豐亞太區主席艾爾敦在他的網誌話，股市已進入瘋狂狀態。瑞銀昨日表示，目前香港股市還未到牛市的時候，料恒指在第三季有可能出現回調，屆時將會係投資者較佳的中長期買入並持有中資股的切入點。該行中國股票策略師唐志剛仲創咗個新名詞，叫做「長期非牛市」，預期中資股下一個牛市要在一至兩年後方會出現，現在指數高點已到達長期非牛市估值的頂點，接下來應該回調。

離奇炒高特別誘人
中環茶友話，不少新聞話復甦在望，經濟已出現「嫰芽」，但報紙的新聞卻充斥着裁員倒閉的消息，即使美國上月新增失業人數32.5萬，只因增速放緩，亦被視為好消息，失業人數增加將影響消費，不明股市為何會升，只能夠講一句，有時股市係咁，偏離基本因素，升得無厘頭，或許這才是股市誘人之處呢。