IMF提出五大威脅

中國改革發展基金會副秘書長湯敏係著名經濟學家，他認為美國經濟可能踏入衰退期，中國GDP增長率已見頂。理由係次按問題像雪球一樣愈滾愈大；漸變成信用危機或支付危機。過去好多金融創新工具面世，佢嘅影響到底有幾大？一開始睇得唔係咁清楚，最後影響有多大？連專家自己都唔知道。　　

環球化所帶來嘅衝擊力去年似乎已到高潮，雖然貸款者利息負擔去年9月起回落，但無法刺激美國經濟增長率回升。美國同時面對通脹及通縮壓力, 金價、油價及食物價格上升；股價、樓價及美元滙價卻回落。日經平均指數自 1990年起分析員有幾多次認為已見底？結果真正嘅底响2003年4月（十三年後）。呢次美股又點？九十年代日本政府企圖利用刺激經濟方案去抵銷八十年代嘅樓市泡沫，但唔成功。到2000年日本政府才肯面對現實，要求銀行大幅撥備，日經平均指數到2003年4月才止跌回升。

經濟從來唔會因為政府嘅主觀願望而改變方向；反之，經濟自由度愈高，繁榮度亦愈高。1932到66年美國經濟過去三十四年，受凱恩斯嘅貨幣政策支配下繁榮，期後出現十二年嘅調整期。1982年美國經濟透過採用供應學派理論而壓低通脹率，出現二十五年嘅繁榮期。可惜格老响2002╱03年將利率降至太低水平，而令經濟繁榮期喺2007年10月爆煲。未來調整期會幾耐？　　

Linens'n Things（傢俬零售公司）因房屋市場萎縮及負債太深昨天已申請破產保護令，該公司响四十六個州共有五百九十間分店，員工一萬七千人。2006年2月 Apollo Management以13億美元收購，二年過去卻面對破產，去年第四季營業額9.62億美元，損失6200萬美元（去年全年虧損2.42億美元， 2006年虧損1.54億美元）。Frontier Airlines Holdings亦申請破產保護令。去年4月至12月虧損1870萬美元，12月裁員10％後，仍然捱唔住。

IMF提出五大威脅　　
IMF發布《世界經濟展望》，指短期內全球經濟面臨下行風險，因面對五大威脅：

一、次按危機可能惡化，源於美國嘅次按危機，將造成全球近萬億美元損失；
二、美國GDP增長率下降至只有0.5％、內需下降令全球貿易量出現萎縮，日本、歐盟同亞洲經濟體出口將受嚴重影響；
三、美國減息令全球大宗商品市場熱錢湧入，形成資金無序流動性增加，使全球通脹加劇，新興經濟體通脹壓力則更為明顯，例如能源同食品價格高企；
四、貿易保護主義擴散，最近已成為美國總統大選熱門話題，近六成美國人認為全球化對美國不利；
五、新興經濟體所受影響可能較OECD國家更大。因為响經濟發展期更易出現狂升或暴跌。　　

美國財政部高級官員David McCormick認為，IMF對美國經濟估計過分悲觀（IMF估計今年GDP增長率只有0.5％、2009年0.6％），佢認為經過四年GDP每年平均上升5％後，今年GDP增長率放緩係無可避免，但原材料生產國及新興市場繼續繁榮，可以反過來帶動美國GDP保持一定增長率。　　

2007 年第四季美國GDP只上升0.6％（全年2.2％，係2002年以來最低），企業純利下跌3.3％，利率已由去年9月5.25厘降至2.25厘，消費信心 3月底跌至64.5，係2003年3月以來最低（2月76.4）。新興市場亦面對食物價格及燃油價格上升，世界銀行估計，今年新興市場GDP增長率只有 7.3％（去年8.7％）。IMF已修訂2008年全球GDP增長率為3.7％（1月份估計為4.1％）。睇嚟唔係IMF太悲觀而係美國財政部危機意識不足。內地壓抑通脹　　

本周北京容許人民幣升破7，代表中央政府打擊通脹率決心及容許GDP增長率降溫（去年估計升幅達11.9％）。
响人民幣升值下，今年首季外國直接投資仍升61％至274.1億美元，證明升值未減外資流入。人民幣升值估計最大壓力係中小製造商，佢地可能失去訂單而向中央政府訴苦……。呢次中央似乎不大理會佢地；因為中央認為引起拉薩騷動理由係通脹壓力，情況同1989年天安門事件類似。中央政府一方面鎮壓，另一方面想辦法壓抑通脹，把CPI升幅由今年2月8.7％壓下去！從呢點睇，人民幣未來升值速度只會加快而非減慢。